ملاحظات ومعلومات

جميع تكاليف الإجراءات:

رسوم الحجز على موعد 12 دولار = 45 ريال

رسوم السيفس 200 دولار = 750 ريال

رسوم سامبا 140 دولار تقريباً = 550 ريال

مكتب الفيدكس في السفارة 125 ريال

المجموع: 1470 ريال سعودي.

ملاحظة للقيام بإجراءات المقابلة:

* تختلف المستندات في شكلها ونوعها من سنة إلى أخرى فقد تكون هناك مستندات إضافية عن السنين التي قبلها وقد تكون هناك مستندات ليست بحاجة لتقديمها وقد تكون هناك مستندات مطلوبة لكن يختلف تقديمها وسأذكر أمثلة.

* الحساب البنكي سابقاً في عام 2006 يطلب لأخر سنة (12 شهر) أماتقديمي لهذه السنة 2010 لايطلب إلا أخر 3 أشهر.

* لاتعتمد على إجراءات الذي قبلك بالضبط ولكن اجعل إجراءات السابقين كاستفادة وكتجربة، استفد من الخطوات التي تكتب في المنتديات الخاصة بالمبتعثين، لكن الإجراءات قابلة للتغير والتعديل والإضافة والحذف.

* نصيحتي بعد تسجيل أسم مستخدم وحجز موعد للسفارة ستظهر الأوراق والمستندات المطلوبة على الموقع الإلكتروني للسفارةK فالبعض لايعيرها اهتماماً، يمكنك تحويل الموقع للعربية والاستفادة منه، فالاجراءات المذكورة في موقع السفارة تعتبر الأحدث والأولى والأجدر لإتباعها، لأنها على الأقل تعتبر مصدر ومرجع أساسي.

يوم المقابلة

اليوم في تاريخ المقال 23 مارش يوم مقابلتي واللي جهزت حالي وكأني داخل لحرب مو فيزا.. طبعاً المستندات كثيييرة جدا جدا جداً لكن الواقع أبسط من استعدادي له..

موعدي المحدد 7:30 والموقع الإلكتروني للسفارة يذكر أنه يجب التواجد قبل بنصف ساعة، لكن أنا تواجدت قبل أكثر من النصف، على الساعة السابعة قال لنا اللي مواعيدهم 7:30 يوقفون في الصف والباقي ينتظر.

المرحلة الأولى: (قبل الدخول للسفارة)

من جميع الصفحات لنموذج DS-160 اللي طبعتهم، طلب مني فقط صفحة التأكيد لنموذج DS-160، يعني البيانات اللي عبيتها  كلها ماطلبها وماطلب الا ورقة التأكيد، لأن البيانات محفوظة عندهم في الموقع، وطلب مني الجواز الحالي، وطلب نموذج الـ I-20 وطلب مني وصل سامبا، بعدها ثبت الأوراق مع بعضها.

يعني طلب مني أربع حاجات بمعنى أنها أهم شي نركز فيه في الإجراءات.

دخلت بعدين للسفارة وصارت لي كذا شغلة لكن ماراح أذكر التفاصيل الغير مهمة.

المرحلة الثانية: (داخل السفارة)

وقت المقابلة كانت سهلات كثييير بشكل ماتصورته.. قابلتني حرمة :) وطلبت مني الأوراق اللي مع بعض اللي ذكرتها في المرحلة الأولى في المقال هذا، بالإضافة إلى كم سؤال وين رحت وين جيت وهي مبتسمة وهل خلصت الثانوية وأنت ناوي تدرس أنجليزي أول ولا دغري الجامعه ووين تشتغل ووين الوالد يشتغل وطلبت مني الضمان البنكي (المالي) وسألتني اذا عندي جوازات قديمه اعطيها اياها... وبس.

صرت أتسائل وين ماطلب وصل السيفس ولا الشهادة الثانوية ولا أوراق الدي أس 160 (ماعدا صفحة التأكيد الأخيرة للنموذج) ولا صور 5*5 ولا كشف الحساب ولا معلومات وظيفتي (الشهادة الوظيفية للتعريف براتبي والزحمة) ولا ولا ولا ووو..

انتهت المقابلة..

عموماً المقابلة سمعت من غيري تاخذ ساعة أو أكثر أو أقل بس مقابلتي ولله الحمد ماخذت 10 دقايق وقالت لي الفيزا راح تجيك من اسبوعين إلى 3 أسابيع وعطتني ورقة للفيدكس.. وكان بمشي البيت لكن الحمدلله واحد من الموظفين أول ماطلعت، قال لي روح الفيدكس وعطهم الورقة هاذي علشان يسجلون عنوانك ويجيبون لك الفيزا لعنوانك.. طبعاً جوازي عندهم الأن، ومكتب الفيدكس في نفس السفارة.

مهما يكن أخذو أحتياطاتكم، ربما يفرق من شخص لاخر في المقابلة وبالتالي قصتي فقط لإضفاء المعلومات عن تجربتي لأحداثي... ومقابلتي كانت في الرياض، يعني يمكن الوضع يختلف في الظهران أو جدة وأأكد على أخذ الاحتياطات من كلووو.

زبدة المقال واللي طلبوه مني:

المرحلة الأولى: الصفحة الأخيرة لنموذج DS-160 (صفحة التأكيد)، أوراق I-20، الجواز الحالي، وصل سامبا.

المرحلة الثانية: أوراق المرحلة الأولى بالإضافة إلى الضمان المالي والجوازات القديمة (السابقة).

أنا أتكلم عساس تركز على الأوراق اللي ذكرتها في المقال هذا مو عساس تكتفي أو تقتصر عليها، لكن أخذو أحتيطاتكم وأعملو كل حاجة، علماً بإني عملت الإجراءات ومشيت على الخطوات استناداً على المصدر الأساس وهو الموقع الإلكتروني للسفارة.

الإستعداد للسفارة أو القنصلية

استعداداً للسفارة جهزت كل اللي يحتاجونه واللي مايحتاجون.. ومن الأوراق اللي جهزتها:

• جوزاتي كلها حتى القديمة + صورة للجواز الحالي
• صور 5*5 (الخلفية بيضاء بدون غطاء على الراس وبدون تعديلات الاستيديو)
• أوراق قبولي في الجامعه
• أوراق I-20 أي توني
• وصل دفع رسوم السيفس
• وصل دفع الرسوم لبنك سامبا
• الاثبات المالي مثل مانقول الضمان المالي
• شهادة الثانوية
• طبعت جميع أوراق DS-160
• حساب بنكي لأخر 3 شهور
• معلومات عن العمل فيه مكان العمل مسماي الوظيفي وراتبي الشهري وخدمتي

والأن مستعد، حتى وصلت درجة الوسواس اذا كان فيه شي ناقص أو لا والوعد في المقابلة.

تعبئة نموذج DS-160

بحكم أني مسافر لأمريكا بغض النظر كوني طالب أو غيره الأن واعتباراً من مارش في 2010 لابد أطبع نموذج دي أس 160 ويحتاج إلى التالي:

* طابعة متصلة علشان أكون جاهز للطباعة.

* صورة 5 سم في 5 سم في الجهاز بدون غطاء على الراس او تعديلات من الاستيديو (طبيعية من العدسة).

* لما جيت أصور قالي الأفضل أنك تجي ببدله عادية يعني مو ثوب.

المهم أني الأن صورت وعطاني صور خارجية قالي تحتاجها في المقابلة، وهذا غير اللي عطاني في الفلاش ميموري، ومن حسن حظي اللي قابلته عارف شغلة التصوير للمقابلة والابتعاث لامريكا.

عموما أنا بكل صراحة مابعد أعبي النموذج لكني جهزت وباقي لي اسبوع الأن على المقابلة .. وصاحبي عطاني رابط شرح تعبئة النموذج http://sfa.saudiclub.us/vb/showthread.php?t=96878

----- كتابة أضيفت لاحقاً-----

الأدوات المطلوبة توفرها قبل النموذج:

التصوير: مقاس الصور 5*5 والخلفية بيضاء بدون أي حاجة على الراس ولا تعديلات الاستيديو على الصورة.

فلاش ميموري: وتكون الصورة من الاستيديو ينقل لك الصورة للميموري بحيث يضبط الحجم بحيث مايوصل إلى ميغا أو حاجة مثل كذا، فمثلاً صورتي كان حجمها مايصل 300 كيلوبايت.

وجود طابع متصلة بالجهاز: هناك طباعة للمعلومات أثناء المراجعة وهناك طباعة للورقة بعد الاعتماد في الموقع.. والورقة الأخيرة مهمه جداً وفيه تأكيد حتى بالبريد وأنصح فيها عساس تكون عندك نسخة محفوظ في البريد.

دفع رسوم التأشيرة (الفيزا)

طيب أخر مقال كتبته كان بخصوص رسوم السيفس للطلاب،الأن في رسوم ثانية اللي هي رسوم الفيزا .. ونفس الكلام مع الفيزا لازم يكون معاي الإيصال كأحد الأوراق المطلوبة لتقديمه للسفارة.

بعد تسديدي للسيفس بكم يوم، رحت للبنك الأمريكي سامبا وقلت له بسدد حق السفارة وهو فهم أنه للفيزا للسفر لأمريكا .. والفرق في الرسومين .. أن رسوم السيفس خاص للطلاب ويرسل من الجامعه .. أما رسوم التأشيرة فهي عامة للمسافرين لأمريكا لغرض الحصول على الفيزا.

المهم أنه عطاني إيصال للدفع وفي حاجة ماكانت في الحسبان .. ولاعندي خبر عليها .. طلب مني رقم الجواز وأسمي أكتبه مطابق للموجود بالجواز .. ومثل ماأنتو خابرين الأسماء باللغة الإنجليزية مو ثابته .. يعني تكتبه بشكل وتشوفه في البنك بشكل والرخصة بشكل.

قلت شيمشورني للبيت ووقتي ظيق لكن الحمدلله لحسن حظي كان اخوي موجود في البيت وأعطاني المعلومات بعد سالفة طويلة.. عشان كذا لازم يكون الجواز معاك أو يكون الأسم مسجل بالضبط في ورقة خارجية مع رقم الجواز الموجود بأعلى كل صفحة على شكل نقاط مخرومة.

طبعاً معلومة مادريت عنها الا بالأمس من كتابتي لهالمقال .. اتصل علي واحد من الشباب قالي عطني أسمك اللي في الجواز (طبعاً لموضوع ثاني خارج المدونة) فقلت له مو معاي الجواز الحين.. قالي مو معاك الرخصة؟ قلت له ايوا قالي تراه مطابق للجواز.. وياحبذا تتأكدون لأني مادري عن هالمعلومة.

دفع رسوم السيفس SEVIS

بعد ماوصلتني أوراق القبول في يدي وأموري طيبة مع الجامعه .. باقي كذا خطوة أخلصها علشان أجمع أوراقي قبل مقابلة السفارة اللي هي 23 مارش.

طبعاً كان مكتوب في الأوراق أن الدراسة راح تبدأ 24 مايو علشان كذا كان عندي وقت من وقت المقابلة إلى يوم الدراسة شهرين وتقريباً بعد المقابلة مافي الا حاجتين وأنا الأن أكتب المقال هذا ولسا مابعد نوصل موعد المقابلة.. تاريخ كتابتي للمقال هذا 5 مارش.

المهم لكوني طالب بروح لأمريكا، في حاجة هامه اللي هي نموذج الاي توني I-20 الموجود بين أوراق الجامعه ودفع رسوم السيفس الخاص بالطلاب ولابد أجيب الوصل معاي للمقابلة .. وعلشان أدفع رسوم السيفس في حاجة أسمها رقم السيفس، طبعاً رقم السيفس الخاص فيني أرسلوه لي الجامعه في الأيميل وفي نموذج I-20 (الاي توني).

المهم أن الجامعه أرسلت لي أيميل في محتواه رقم سيفس خاص فيني وموقع إلكتروني علشان أعبي النموذج وأدفع الرسوم من خلال الموقع على نفس رقم السيفس اللي عطوني، وللعلم رقم السيفس دائماً يبدأ بحرف N، وهذا الرابط: www.ice.gov/sevis ، وفيه رابط ثاني يؤدي إلى نفس المقصد، وعطاني صاحبي رابط ممتاز سهل لي عملية شرح طريقة دفع رسوم السيفس بدون مساعدته أثناء تعبئة النموذج: http://www.mktml.com/ib/lofiversion/index.php/t14439.html

طبعاً الرابط مختلف عن اللي عندي لأني نسيت السابق وبحثت عن طريق جوجل وحطيت الرابط المذكور... وللمعلومية لكوني بعبي النموذج فأكيد بدفع رسوم السيفس يعني مرتبطين مع بعض.

أخيراً في النهاية جاتني صفحة للطباعة.. وطبعتها لأن بدونها ماكأني دفعت الرسوم للسيفس... والصفحة هاذي هي وصل رسوم السيفس

* رسوم السيفس 200 دولار أي مايعادل 750 ريال.

تنبيه: أثناء ماكنت أعبي النموذج جاتني خانة رقم السيفس مكتوب N، بمعنى أني لازم أنسخ الرقم بدون N، والبعض يخطىء بمجرد مايشوف خانة رقم السيفس على طول ينسخه بالكامل ويحطه.

تنبيه: ضروري جداً وجود طابعة قبل البدء في عملية تعبئة النموذج علشان أطبع الإيصال في النهاية (إيصالرسوم السيفس).

وصول أوراق القبول مع الـ I-20 (الاي توني)

مثل ماتكلمت عنه في المقال السابق..

أرسلو لي أنك انقبلت وكان بين أوراق القبول أوراق الاي توني حدود 3 أوراق وكل حاجة أوكي لكن كل هالكلام على الأيميل وأنا بحاجة للأوراق علشان السفارة راح تطالبني فيها بحكم أني حجزت موعد للسفر ولدخول أمريكا كطالب هذا من جهة، ومن جهة ثانية فيها معلومات أحتاجها لبعض الإجراءات مثل رقم السيفس الموجود في الاي توني اللي لازم أخلص أموره.. لأن السفارة راح تطلبه مني هو الثاني والاي توني لابد يكون مرفق مع أوراق القبول.

المهم مثل ماتكلمت عنه أن أرسلو لي ايميل يخبروني أنهم قبلوني وارسلو بعدها رسالة قالت لي المشرفة عن القبول في الجامعه في محتوى الايميل أنها أرسلت لي الأوراق عن طريق مكتب UPS وعطتني رقم التذكرة، أنا قلت وشسالفة UPS هذا .. قالي صاحبي هاذي شركة للشحن مثل الأرامكس والفيدكس و DHL وغيرها. وقالي صاحبي أن هاذي شركة بطيئة على ماتوصل ومو شي .. قلت على الله

المهم قالي الرقم اللي عطتك أياه في الأيميل هو رقم التذكرة وأقدر أشوف حالة الشحن (اللي هي الأوراق) عن طريق الموقع: http://www.ups.com وأحط الموقع Saudi Arabia-English ويرشدني للرابط http://www.ups.com/content/sa/en/index.jsx?flash=false وعلى جنب مربع Tracking Number وضعت فيها رقم التذكرة الموجود بالأيميل، ويفتح لي مربع منبثق، وأضغط على الوصلة في أسفل المربع، وفتحت لي صفحة Trcaking Detail في معلومات الشحن، وأضغط على show package progress وطلع لي جميع العمليات للشحن وكنت متابعها، ووصلت لأربعة أماكن قبل دبي، وبعدين وصلت دبي كمحطة خامسة وبعدها البحرين وبعدين الظهران وبعدها الاحساء، وكل هذا كان في خمسة أيام. طبعاً ماعندي دراية بمواقع الشحن الباقي ولا كان كتبت الطريقة علشان يستفيدون اللي يهمهم الموضوع.

مراسلة الجامعه والحصول على قبول

بحكم أني أعرف شخص يدرس في أمريكا بالتالي تسهلت أموري والحمدلله علشان كذا هو عمل لي Scanning(سكانر) لأوراق نموذج التسجيل من الجامعه وأرسلهم لي على الأيميل.. وبعدها طبعتهم وكتبت جميع بياناتي بمساندته في فهم حقول نموذج التسجيل.

دخلت أوراق التسجيل للجهاز عن طريق السكانر وأرسلت لصاحبي محمد، وكانت الأوراق المطلوبة للحصول على القبول:
نموذج التسجيل الخاص بالجامعه والجواز وشهادة الثانوية (المترجمه) .. طبعاً كلها عملتها أنا بالسكانر، وبكذا ارتحت من الروحة والجية لكباين الاتصالات والفاكس وصار تسجيلي مباشر مع الجامعة من خلال صاحبي.

وكانت المراسلة في أخر خمسة أيام من شهر 1 (يناير) 2010 وجاني القبول عن طريق الأيميل في تاريخ 10 من شهر 2 (فبراير) وأرسلو لي أوراق القبول عن طريق مكتب UPS، هذا مكتب للشحن والمراسلات مثل أرامكس وفيدكس و DHL، والحمدلله في غضون 4 أيام اتصل على مكتب UPS وقالي جاتنا رسالة من جامعة كنتاكي لك.. تقريباً القبول جاني في تاريخ 10 فبراير والأوراق وصلت في 14 فبراير.

ترجمة الشهادة وختم التصديق

في الدمام:

رحت الدمام وترجمت شهادتي للغة الانجليزية، وعلشان تعتمد وتصير رسمية من الدولة، توجهت مباشرة لوزارة الخارجية عند الكلية التقنية علشان يختمون وتكون الشهادة مصدقة، وللأسف قالو لي الأن التصديق عن وزارة التربية والتعليم، واشوي اروح لوزارة التربية والتعليم، وللأسف مرة ثانية قالو لي عند مركز الاختبارات بالدمام، وبعد ماوصلت كان يوم متعب، قالي بكل برود انت من الأحساء والتصديق من الأحساء وكل حاجة من الأحساء.... وأنا طاير الدمام واثاري كل حاجة وحتى الترجمه عندي بالمنطقة..

في الأحساء:

جبت الترجمة قالي هاذي مو معتمدة عندنا، قلت طيب والحل .. قالو حنا نترجم وحنا نصدق، انت بس عطنا صورة لجوازك وبطاقتك وشهادتك الأصلية واحنا نتصل عليك وكل حاجة جاهزة بدون ماتروح لأي مكان بعدنا!!
ولحسن الحظ كان معاي جوازي وشهادتي، ونزلت للدور الأرضي وصورت أوراقي من عندهم وفي نفس الساعة سلمت لهم كل حاجة.

كل شي تغير

علشان ماتطيح في خطأي.. أنا ربطت الاجراءات القديمة بالجديدة .. بالأول من الدمام والأن من الأحساء.

بالأول الترجمة من الوزارة أو أحد المحلات المعتمدة وختم التصديق من الوزارة الخارجية والأن الترجمة والتصديق من وزارة التربية والتعليم.

وباختصار شديد .. وزارة التربية والتعليم تخلص لك أمورك كلها من ترجمة وتصديق للشهادة المترجمه .. ولتحوس مثل حوستي.

من إدارة التربية والتعليم بالأحساء إلى وزارة التربية والتعليم بالأحساء، انفصلت عن الدمام بالتالي مستقلة بمعاملاتها ..

تأكد من وزارة التربية والتعليم في منطقتك لأن أحد وظائفها الترجمه .. يفضل الاستفسار .. فالأوضاع تتغير عن السابق.

الضمان المالي

كبداية وتجهيز لمراسلة الجامعة فالجامعة تحتاج إلى معرفة:
1- وجود عندي شهادة ثانوية.
2- عندي المبلغ اللي يقدر يغطي مصاريفي .. وأعني الضمان المالي.

بعد تجديد الجواز وكأحدى خطوات البداية من إجراءات القبول، طلعت مع  أبوي للبنك وطلبنا شهادة لاثبات مالي واصدرناها، وكان توه أبوي متقاعد من أرامكوا يعني انتو عارفين الموضوع.

وللمعلومية موضوع الضمان أموره سهلة في الاصدار إذا كان المبلغ متوفر .. مايحتاج يكون الوالد اللي عنده المبلغ، حتى لو كان على حسابي أو من الأقارب بأسم عمي علساس في تقديم الطلب أكتب المسئول عن تكاليفي عمي أو أي واحد.. وعلى قولة واحد من الشباب: حتى لو هندي البقالة الموجود قريب البيت، يقدر يطلع لك ضمان مالي وتمشي أمورك إذا توفر عنده المبلغ اللازم.

يعني لازم يكون في الحساب حدود 115000 أو أكثر (حد معرفتي) لإصدار الضمان المالي.

وواقعاً أنا مابي عمي يصرف علي أو غيره أو حتى أبوي، كل اللي ابغاه اصدار الشهادة علشان أقدر أسجل وتمشي إجرائاتي وبعدين أحول على البعثة.

* معلومة: الضمان، الاثبات المالي، الشهادة كلهم نفس الكلام.. المقصد حاجة تثبت مقدرتك على تكاليف الدراسة والعيش هناك.
* معلومة2: لابد يكون الضمان المالي فيه أسم صاحب المبلغ وأسم المستفيد، لأن أبوي لما جا بيصدر الضمان المالي سألوه عن السبب، وحطو أسمي لكوني فرد مستفيد. باختصار المالك والمستفيد لازم تنحط أسمائهم.

صارت سالفة لواحد من خوياي راح يطلع ضمان مالي، والبنك كان بيجيبون فيه العيد ولا حطو اسمه. بس أخوه موجود بامريكا ورتبه في الجامعة واقنعهم بالضمان، فالأحتياط واجب.

الحجز على موعد السفارة

هنا صملت على الدراسة والخروج من شركة أرامكوا وقلت لمحمد بعد يومين أعطيك الإشارة بس بعد ماأضبط وضعي الخاص، وبعدها بيومين من كلامي مع محمد عن طريق برنامج سكايب عطيته الإشارة ببداية التحرك لإجراءات البعثة، وثاني خطوة بعد ماجددت الجواز كانت حجز موعد في السفارة.

طبعاً السفارة تطلب الكثير من المستندات مثل أوراق القبول والسيفس وحاجات كثيرة نعرفها قدام..

لكن محمد حجز لي موعد في السفارة بحكم الوقت، وأقرب موعد لقيته كان بعد 3 شهور !! (ياساتر يارب لهالدرجة زحمة !.)

قلت له طيب مستنداتي مو جاهزة .. قالي نقدر نحجز بدون اي بيانات مطلوبة بس على الأقل ناخذ مكان وبالتالي يمدي نعمل جميع الاجراءات ونخلص المستندات المطلوبة على مايجي موعد المقابلة.

وبالفعل سجلنا يوزر وباسوورد بـ 12 دولار أمريكي وبعدها حجزنا موعد على موقع السفارة الأمريكية https://ksa.us-visaservices.com/ ، ومن خلال اليوزر نرفع البيانات المطلوبة حبة حبة وأولها انا عملت بيانات السيفس (بعدين نعرفها).

ومع الوقت عرفت ان الموعد كان مهم جدا جدا جداً للحجز... وبالتالي أنبه من نقطة الحجز على الموعد وعدم التأجيل ولا تقول لاحق عليه فالعكس صحيح .. الموعد ماتلحق عليه أما الاجراءات هي اللي تلحق عليها.

----------------------------------------------------------

ملاحظات بخصوص موضوع المقال:

حاجة مهمة: مو أي أقرب موعد تحجزه، كان وقت بداية تحركي للإجراءات تقريباً في 8 يناير ولقيت موعد في 11 يناير لكن ماحجزها لي محمد. ليه؟؟

الإجابة: لازم قبل المقابلة تكون جميع المستندات جاهزة مثل أوراق القبول من الجامعه.

* الجامعه وأوراق القبول خلصوها في غضون اسبوعين ورسلوها لي ووصلتني الأحساء بعد 4 ايام يعني المجموع تقريبا 3 أسابيع.

وأقرب وقت لي غير يوم 11 يناير كان في مارش وبالتالي حجزت اللي في شهر مارش (شهر 3) علشان يمديني اسجل بالجامعه واحصل على القبول واجمع اوراقي.

ملاحظة: أنا سجلت في 8 يناير وحصلت على يوم فاضي لتسجيل الموعد في 11 يناير (يعني 3 أيام)، وفي وسط المقال ذكرت أن 3 شهور أقرب موعد حجز لي؟؟ كيف؟

الجواب: احياناً (قليلاً) نشوف الأيام ممتلئة لشهرين قدام بس يكون يوم فيه مجال بسبب أحد الحاجزين سحب موعده.

بداية العزم

بعد تخرجي من الثانوية العامة انقبلت في كذا كلية وجامعة ولله الحمد وكان من بين القبول انقبلت على البعثات وكانت أول سنة سنحت الفرصة لابتعاث الطلاب، لكن بسبب قبولي في ارامكوا استدعى هالشي أني اتوجه لارامكوا، وبصراحة كنت سعيد اني مقبول في ارامكوا لكن الرغبة في في مواصلة الدراسة كانت موجودة، ومن أول سنة وأنا أدرس في شركة ارامكوا رجعت افكر في البعثات ورغبتي الشديدة في تخصص الحاسب الآلي.. واستمريت في الحلم بمواصلة الدراسة طول فترة جلوسي في شركة ارامكوا.. وكان التفكير في الخروج من ارامكو يتوارد علي كثير لكن الأمر صعب، والفرص مرورها مثل السحاب وبكل صراحة أرامكوا تعد في مجتمعنا فرصة ذهبية وموقفي كان صعب جداً.

وبعد أربع سنوات في أحد أيام إجازتي كنت أتكلم مع صديقي محمد عن البعثات ورغبتي الشديدة في مواصلة الدراسة، وماقصر محمد بدا يهتم في الموضوع وقررت اني ابتدي اوراقي.

وأول خطوة سويتها جددت جوازي .. لأن ماراح أقدر أعمل إجراءات التسجيل أو حجز موعد السفارة والجواز مو جاهز.

المقدمة

طبعاً كبداية أحب أقدم هالمدونة الشخصية واللي انشالله تفيد كل من يهمه الأمر.. وكمتابعة للأحداث أفيد بأن بدأت كتابتي في 1 مارش 2010 يعني في بعض الأحداث أكتبها سابقاً لحتى ماأوصل مع الأحداث بكتابتها مباشرة ويكون التدوين بالحدث.